مدينة شيخ سعد…و ذاك الصوب
بقلم. ا. حسين زامل
هواي مواقف بشيخ سعد بقت راسخة بعقول الناس؛ مرة يرددونها للفكاهة .. ومرات تصير عرف اجتماعي ومثالها:
الشهيد (مؤيد جواد حجي كاظم) الله يرحمه بنهاية الثمانينات واكف بالكازينو الي هي (مطعم 7 نيسان ومقهى طارق يوسف بليخ والنادي ومطعم الامير ومطعم الجندول) سابقا هااي المنطقة كان هذا اسمها (الكازينو)…
سايق تكسي سائل “مؤيد”؛ هااي المنطقة شسمها،،، مؤيد راد عليه هاي اسمها (ذاك الصوب).. الرجال فار ايده وطالع!!!!؟
مريسل الله يرحمه راد على مؤيد گايله اشبيك انت دايخ هي غير شيخ سعد… مؤيد يرد اي والله هسة صدگ دخت اني قبل دايخ بذاك الصوب شلون ينامون وهسة طلعت هم شيخ سعد ..!!
كلام مؤيد صحيح… ذاك الصوب كانت نشوفها منطقة بعيدة اولها المنطقة الي بنيت نهاية الستينات بعد تبليط الشارع العام وهو السايد القادم من بغداد باتجاه العمارة، وقبلها كانت عبارة عن 7 بيوت و 5 مطاعم على طريق السدة الترابية الي تعتبر بوقتها الطريق الرابط بين محافظات الوسط والجنوب،،، ومكانهم حاليا وبالتحديد بيت حطحوط وبيت سيد غالب وقبل ان تبنى قرية الچعب .. والبيوت هم بيت ابليخ وعندهم مطعم وبيت حسن غبين و عنده مطعم و بيت مجيد غبين و عنده مطعم وبيت نشمي وعدهم مطعم و مطعم نجيب اخو گرگيس اضافة الى بيت علاوي الحمايلي وبيت كعيد بكتاش ..
ذاك الصوب الحالي: كان اوله المنطقة الي تبدي من بيت حسن غبين قبل لا يجون بيت محمد حمد من الشهابي و تنتهي ببيت كعيد بكتاش … … وجزئها الاخر يتكون من الـ 50 دار والي تم بناءها نهاية السبعينات واكتملت بداية الثمانينات باركانها الاربعة الي تبدي من بيت لطيف جاسم وتنتهي في بيت علي حسن غبين، ومن بيت سيد ناصر الهماشي، الى بيت محمد حسن عبدالهادي في الركن الاخر وكل ما حولها ارض قاحلة وصولا الى بيت خلف عكال والبيوت 6 المجاورة له ثم بيوت الطرق والجسور 6 براس الجسر القديم وبعدها قرية الچعب وبيت شياع الدبيسان المنعزل وحده ،،،
اما دوخت مؤيد بذاك الصوب شلون ينامون!!؟ لان جانت مثل الميناء الاف السيارات يوميا تمر على طريق (بغداد عمارة بصرة) وعلى مدى 24 ساعة وخصوصا في الثمانيات بنقلات الارتال العسكرية و لان حينها ماكان موجود الطريق الدولي؛ وحتى في التسعينات لان انغلق الطريق الدولي بسبب التسليب ..
ذاك الصوب ما تذكر اذا ما يذكر استاذ فهمي الله يرحمه او بيت حسن غبين و فرحان ابليخ و السفن مالتهم لنقل البضائع والنفط الاسود وطريقة سحبها مثل ما بالصورة،،، و لازم يحضر فالح حسن غبين وقوته الجسمانية العجيبة و كمية الاكل وطريقة اكله..
ذاك الصوب من تذكرها تبتسم وحدك تحسها كانما مسرح كوميدي لازم يجي ببالك موقف او طرفة من امريسل او حجي ناجي دخيل او حجي جبار دخيل او ارميض او بيت احميد عناد و اوحيد و ارعيد .. الله يرحم الاموات ويحفظ الاحياء
ذاك الصوب صارت مدينة عملاقة وبيها دوائر حكومية و مئات البيوت والمحلات .. لكن حادثة مؤيد الي قبل 40 سنة تقريبا مازالت لليوم تتردد.. رغم ذاك الصوب صارت اكبر من الولاية القديمة باربع مرات.. لدرجة قبل ايام تفاجئت بيت شياع الدبيسان صار وسط البيوت … لكن بعدها ذاك الصوب ..
ربي يحفظ شيخ و اهلها الصوبين الولاية و ذاك الصوب
الكثير من المعلومات من ابو سجاد عبدالمنعم نجم نسأل الله ان يحفظه ويعطيه الصحة والعافية ..
الصورة من احدى الصحف البريطانية التقطت عام 1944 لسفينة المهيالة .. ربما تكون احدى سفن بيت غبين او بيت بليخ