نجم عبد طارش
قانون التعريفة الكمركية في العراق من اغرب القوانين …تفرض الدولة ضريبة موحدة على السلع الداخلة للبلاد وتطبق التعريفة على منافذ المحافظات ومواني البصرة ولكن اقليم كردستان خارج هذه التعريفات… ليش وشنو السبب؟ السبب الحقيقي ان الاخوة في الاقليم يرفضون تطبيق هذه التعريفة وحتى لو طبقت فأن عائدات الضرائب ستذهب لسلطات الاقليم وماتروح لسلطة بغداد …يعني شنو؟ يعني المواطن ببغداد لو الناصرية لو الرمادي لو البصرة يتحمل عبئ الضريبة ولكنها لاتدخل لميزانية الدولة …ولهذا استثنيت منافذ الاقليم من فرض هاي الضريبة… شنو اللي صار… التجار راحوا لمنافذ الاقليم حتى مايدفعون الزيادة بالضرائب وبما ان وارداتنا بنسبة كبيرة منها تاتي من ايران وتركيا واكو مطارات بالاقليم راحت اغلب السلع لمنافذ الاقليم وفقدنا حتى الضرائب الاصلية من المواني والمنافذ خارج الاقليم …الحكومة سوت اجراء اخر هو عبارة عن معالجة لهذا الخرق سوت سيطرات ونقاط تحاسب ضريبي في كركوك والموصل يعني السلع اللي تدخل من جمهورية كردستان الشقيقة نفرض عليها ضرائب في الموصل وكركوك مثل ماكان سابقا بسيطرة الصفرا اللي حاولت تحل نفس المشكلة وفشلت …ماهو الحل ؟ الحل هو تفاهم مع الاقليم بشكل واضح لو احنا دولة فدرالية مثل مايقول الدستور والدول الفيدرالية سلطة الضرائب فيها تعود للمركز لو احنا دولتين …اذا دولتين لازم ماندفع للاقليم مخصصات واموال او ان يتم استقطاع مبلغ الضرائب من حصة الاقليم او ايجاد صيغة جديدة وواضحة نقول لاخوتنا واحبتنا في الاقليم لو تبقون ويانا على حب الله لو كل واحد يروح لحالة بأحسان ومعروف…بدون ذلك سندمر موانئ البصرة ومنافذنا ومطاراتنا ونظل ندفع مايشبه الخاوة ومواطنينا يتحملون عبى ضرائب تروح لجهة اخرى… الموضوع ربما معقد لكن يحتاج لقرار ومواقف شجاعة ….
