كامل الدلفي
رَيِّض يا حَزَنْ…
لحظة أرد أحاچِيك،
طبعٍ عندك …
تْنام أبيْن الگلوب؟
تجيم بالخيال وبالمسافات،
وتصير دموعٍ منثورة علَى الدروب.
توشّل الفرح …
وتنام علَى طَرْواه،
و تمطر علمشاعر
وجع حالوب،
وتحطّ علَى الضِّحك ورگات صبّار،
يهيْلن علَشْفايف…
شوگ معطوب.
ما بَسْك!
نريد الفرح لحظات،
أنتمضمّض من حلاته
بريج مرطوب،
لأن طبعك غليظ وجهم مَلْگاك،
عشنا ويّاك
ظِلْمة بوحشة غروب.
بلچِن حسّ صبح…
ونفرزن الشوف،
ونحرگ خوفنه…
ويّ كُومة ذنوب.