حلوة بلادي …
بقلم الشاعر والإعلامي / فريد الدليمي
حلوة بلادي وتمطر فرحة
وبيها الخير أشكال ألوان
أهل الملگه وأهل الطيبة
وترحاب ودلة وفنجان
حلوة وطيب اهلي محليها
وطيور الحب تفتر بيها
فوت وشم نسمات بلادي
وبالبال يظل العنوان
حلوة بلادي وتمطر فرحة
وبيها الخير اشكال الوان
تفضل يا ضيف وشرفنا
لجلك إحنا ضيوف نصير
إشرب گهوة وچاي مهيل
ونگلك: الله بالخير
نلعب “دبكة” “عراضة” و “چوبي”
غربي شمالي شرقي جنوبي
نسهر على دجلة ونتعلل
ونسامر شاطي وبستان
حلوة بلادي وتمطر فرحة
وبيها الخير اشكال الوان
محروسة بإسم الله وتبقى
بيت يلم كل الخطار
نكبر بيها وتكبر بينا
ونعمرها زغار كبار
“عمر” و “آزاد” و “علاوي”
وطعم الزهدي والخستاوي
و” الساهر” و” حضيري” و “داخل”
تحلى بلمتنا الألحان
حلوة بلادي وتمطر فرحة
وبيها الخير أشكال ألوان
